المدون: بكتيريا الغضب

يتم التشغيل بواسطة Blogger.

2012-12-14

بكتيريا الغضب

11:41 م | Posted by شارك معنا

الابتسامة معدية يعنى لو حد ابتسم في وشك هتلاقى نفسك تلقائى بتبتسم، كمان الغضب معدى لو حد كشر فى وشك هتلاقى روحك قفشت وابتسامتك راحت ، وملامحك اتبدلت، ولو انفعل عليك هتنفعل عليه، كله ده عشان محكمتش عقلك وخدت مضاد حيوى ومصل الوقاية من بكتيريا الغضب، وزى مابيقولوا الوقاية خير من العلاج.

لو فى مشكلة دايما بندور على العاقل اللى فى الموضوع عشان واثقين انه بيفكر فى الامور بعقله مش بدراعه وده الوقت اللى بنحتاج فيه حد يطفى النار مش يزيدها

طب ليه بندور على العاقل ده وبسرعه كمان لان كل لحظة بتعدى الامورممكن تزيد للاسوأ ، لاننا عارفين انه عدى عليه موقف قبل كده واستخدم الصبر والحكمة متصرفش حسب الموقف واللحظة ورجع ندم ناس حواليه

طب هو بيعمل ايه ... ابدا بيعمل تحليل سريع للموقف ، رؤية لابعاد الموقف ( نظرة لبعيد ) ، بيشوف ايه اللى ممكن يترتب على الموقف من مساوى ويقلل منها

وهو امتصاص للغضب مش قلة حيلة زى ماالبعض بيدعى، بالعكس الدليل على ان النوع العاقل ده نادر هو اننا بندور عليه اول واحد لانهاء الازمة

وعارفين انه لو مش موجود يبقى وباء الغضب هيتفشى وهينتشر فى جزء من الثانية ولكن لو انقذنا الموقف بلحظة عقل هيحصل هدوء واستيعاب وانهاء للمشكلة .ويبقى البطل فى النهاية هو العقل .فما اهون التفاهات والصراخ والعويل وافتعال المشكلات .

والاصعب دائما هو الاحتواء والتفكير واتخاذا لقرار الصحيح فى الوقت المناسب.

يبقى لازم نراجع نفسنا كتير قبل مانسيبها تغلط و نرجع نلومها وقت لا ينفع الندم

بقلم / ياسمين يوسف

Labels: تنمية بشرية, ياسمين يوسف

بكتيريا الغضب

0 comments:

إرسال تعليق